الإستثمار في العقار واحد من أهم وسائل الإستثمار اللي من خلالها تقدر تحقق استقرار مالي ، لأنها بتحققلك عائد مالي كبير .
وسواء كنت مستثمر عندك خبرة أو مبتدئ في مجال الإستثمارات العقارية خلينا نتفق إن البداية الصح هتلعب دور مهم جدا في نجاحك في استثمار العقارات .
وعلشان كدا أنا النهاردة هاخدك معايا في رحلة بسيطة أقولك فيها إزاى تنجح في الإستثمار في العقارات ؟
- وضع خطة استثمارية :
أول خطوة هتعملها هي إنك تحط خطة استثمارية تكون واضحة ومحددة بأهدافك الإستثمارية تكون مكونة من أهداف قصيرة وبعيدة المدى ونوع العقارات اللي حابب تستثمر فيها مثلا ( وحدات سكنية ولا تجارية ولا إدارية ) ، كمان تحدد موقع الوحدات وزي ما ذكرنا في المقال السابق مهم إنك تختار منطقة حيوية ده هيساعدك جدا إنك تشوف الصورة كلها وبالتالي تركز على أهدافك وتقلل ضياع وقت أو جهد .
- البحث والتحليل :
ابحث بعناية في السوق العقاري والمناطق الحيوية اللي ممكن تستثمر فيها وكمان العائد الناتج أو المتوقع كمان المخاطر المحتملة في العقار اللي ناوي تشتريه .
- التمويل :
قبل ما تبدأ في رحلتك الإستثمارية لازم تحدد مصدر التمويل من البنوك مثلا أو الشركات الإستثمارية .. يعني تبدأ تحدد ميزانيتك وبعدين تدور إزاي تلاقي تمويل مناسب .
- الشراكات :
ممكن تعمل شراكات مع مستثمرين تانيين في حالة عدم توافر التمويل الكافي مثلا وده بيكون حل مفيد لتقسيم التكاليف والمخاطر وزيادة رأس المال المتاح .
- الصيانة وإدارة العقارات :
حافظ دايما على صيانة العقارات الخاصة بيك وإنها تكون دايما في حالة جيدة واهتم بالصيانة الدورية علشان تحافظ على قيمة العقار وبالتالي ده هيزود انجذاب المشتريين أو المستأجرين المحتملين .
- متابعة التطورات السوقية :
مهم جدا إنك تفضل متابع حركة السوق والعرض والطلب لأن التغيرات في السوق ممكن تأثر على الاستراتيجية الخاصة بإستثمارك العقاري .
- تواصل مع المحترفين :
إنك تبني شبكة علاقات ناجحة ده هيديلك فرصة دعم وخلق فرص لكل من المستثمرين العقاريين الجدد أو المتمرسين سواء كان مثلا وكيل عقاري أو وسيط أو مستثمر .
والنوع ده من المجموعات الإجتماعية اللي بتبقي مؤلفة من موجهي أعمال معتمدين و شركاء أعمال وعملاء أو أعضاء منظمة غير ربحية هتدي مساحة للمستثمرين إنهم يتحدوا نفسهم ويدعموا بعض وده لأن الإستثمار العقاري بيعتمد بشكل كبير على المعرفة التجريبية .
فيتعلم المستثمر من تجارب سابقة في الإستثمار العقاري حتى لو كانت فاشلة فالنجاح بالنهاية هو حصيلة تجارب متعددة يتخللها الفشل مع المثابرة.
بصرف النظر عن الدعايا المستهلكة اللي بتصوّر الإستثمار العقاري طريقة سهلة ومفروشة بالورود لجمع الثروات إلا أن الواقع مختلف تماما لأن النوع ده من الاستثمار مليء بالتحديات والعثرات وبيتطلّب قدر كبير من الكفاءة والخبرة والتخطيط والتركيز.
فالإستفادة هنا إنك لازم توسع دايرة علاقاتك و تبني شبكة علاقات قوية مع وكلاء العقارات ومقاولين بناء ومحامين عقارات ومستشار ضرائب لأن ده ممكن يساعد بشكل كبير إنك تطلب المساعدة أو المشورة منهم عند الحاجة .
- التعليم المستمر :
خليك دايما بتدور على أي فرصة تساعدك بتزويد معرفتك ومهاراتك في الإستثمارات العقارية ممكن مثلا تقرأ كتب أو مقالات أو تحضر ندوات ودورات تدريبية وكمان تكون مطلع على القوانين والأنظمة والمصطلحات العقارية والإتجاهات العامة اللي بتشكل قاعدة الإستثمار في العقارات .
ومن هنا نعرف إن أي مستثمر ناجح بيهتم بتثقيف نفسه بإستمرار في طرق العقار وشؤونه للتكيف مع أي تغير ممكن يحصل في القوانين .
- توكيل محاسب :
الضرائب قسم مهم جدا لا يمكن الإستهانة بيه من مصاريف المستثمر العقاري .
ممكن يبان إن فهم القوانين الضريبية معقد وبيضيع وقت كبير بعيدا عن عالم الأعمال وعلشان كدا المستثمر الذكي بيعتمد على محاسب ذكي يقدر يدبر كل التفاصيل المتعلقة بالمال ودي نصيحة مهمة جدا علشان تكون مستثمر عقاري ناجح .
المستثمر العقارى لازم يعرف إن المصاريف المرتبطة بالمحاسب بتكون هامشية لو تم مقارنتها بالإدخارات والأرباح التي بتنتج عن توكيل محاسب شاطر وخبرة.
في النهاية فإن الإستثمار العقاري بيتطلب الصبر .
استثمار عقاري يعني عمل جاد وتخطيط الجيد وبالتالي هتقدر تبني مستقبل مالي مستدام وتحقق أهدافك الشخصية والمالية .
استفيد من الفرص المتاحة وخلي الإستثمار العقاري قصة نجاحك القادمة .